Ka JIngiaseng Samla KJP Synod Sepngi ha Nonglang

Ka Jingiaseng Samla Khasi Jaintia Presbyterian ( KJP) Synod Sepngi kaba Khadsan ka la long ha ka Balang Presbyterian Nonglang, District Langja, Tonghor Presbytery kaba jngai kumba 40 km na Nongstoin.Katei ka jingiaseng synod ka la sdang naduh ka 24 tarik mynta u bnai bad ka la kut noh mynta ka sngi kaba long ka sngi u Blei.Ka phang pdeng jong ka synod kaba la long mynta u snem ka long ” Ia ngin ieng ban tei” Nehemaia Lynnong 2 dkhot 18, katba ka subject ka balang pat ka long ” To iaineh skhem kum ki samla khristan ha ki sngi ki ba eh ” Haba sam ia ka khubor na ka ktien u Blei ha ka jingiaseng ha ka por 10.30 mynstep u Rev. R. R. Rapsang, u la sot na ka shithi u Appostol Paul sha ki nong Kollosai ka lynnong kaba nyngkong bad ka dkhot kaba 27 ( 1: 27) uba la kren shaphang ka shithi kaba u Appostol Paul u la thoh sha ki nong Kollosai ha ka por ba u don ha iing byndi bad ha katei ka shithi u Paul u la thoh shaphang u Jisu ban pynsngewthuh sha ki nong Kollosai ba u Jisu u long u Blei, namar ba ki nong Kollosai kila shah hikai bad shah ialam bakla namar ka jingiakhleh jong ki niam bad ki la ngeit ruh ba u Jisu u long tang uba khlain bor hynrei um long u ba khraw haduh katta katta haduh ban ong ba u long u nongpynim.

Kumta u Paul u la hikai ia ka jinglong tynrai jong ka niam khristan ban pyni ba u Jisu u long uba khraw bad halor baroh bad u la pynbeit ia katei ka jingshah ialam bakla jong ki nong Kollosai.

U pastor Rapsang u la kren ruh shaphang ka jingkyrmen bad ka burom, da kaba u la ong ba ka don ar jait ka jingkyrmen kawei ka dei ka jingkyrmen ha ka Bible bad kaba ar pat ka dei ka jingkyrmen ha ka pyrthei bad u la pyniasriem ruh ia ka jingim ki khristan ha kane ka juk kaba mynta kaba long ka juk jong ka jingduh jingkyrmen bad shah ialam bakla hynrei kito kiba ap ia ka jingkyrmen ha ka ktien ka jong u Blei kin ioh ia ka jingkyrmen kaba neh junom katba kiba ap ia ka jingkyrmen jong ka pyrthei kin nym long eiei hakhmat ka ktien ka jong u Blei.

U Rev. H. K. Nongbsap pat haba ialap ia ka ktien ka jong u Blei ha ka jingiaseng kaba ar sien u la kren halor ki lai tylli ki mat kata ka Jingshisha, ka jinglaitluid bad u ban jur bha ia ka mat kaba lai kata ka Jingieid ia kaba u la pynshong nongrim na u Apostol Paul ka lynnong kaba nyngkong bad dkhot kaba 13.

“Lada ngim don ia ka jingieid ha ngi ka mut ngim don shuh ia ka jingshisha bad ia ka jinglaitluid namarba ka Jingieid ka iasohlang bad ka dohnud bad ka saiñdur ruh naduh na iing shaduh ka imlang ka sahlang ” ong u pastor.

Ha katei ka sngi la ioh ruh ia ki jingrwai kwaïar na ka RI- Lyngngam Presbytery , New Nongstoin , Pariong , bad na ka Standing Choir KJP synod Sepngi bad ha ka jingiaseng kaba ar pat la ioh ia ka jingrwai kwaiar na ka Balang Mawlai, Nonglang, Standing Choir Synod KJP Sepngi bad na ka Balang Umsaw khwan.

You may also like...