Iam briew ka Balang Presbyterian na ka bynta ki lanot aksiden kali

Ki paidbah kiba la poi da ki hajar hajar ngut sha ka Jingïaseng Samla KJP Synod Sepngi ha Nonglang, kiba bun ki la jaw ummat ha ka por ba u Rev. Dr. MJ Hynñiewta, u la duwai kyrpang na ka bynta ka jingjia ha ki parabangeit kiba wan sha ka Jingïaseng ha Nonglang, ha kaba 17 nut ki la khlad bad 62 ngut ki la mynsaw ha ka jingkylla ka trok hajan Nongspung.

Kane ka long ha ka por ba pynwai ïa ka jingïaseng kaba 1:30 janmiet, haba u Pastor Hynñiewta, u la ai ïa ka jingkyrkhu pynwai bad u la duwai kyrpang ruh na ka bynta kane ka jingjia. Katba ka jingduwai ka dang ïaid la ïoh sngew ïa kiba bun kiba la ïam bad jaw ummat namar kane ka jingjia. Ki paidbah ba wan sha kane ka jingïaseng ki la mih da ka khmat kaba sngewsih ryngkat ka jingsngew pangnud.

Ha kajuh ka por na ka liang ka KJP Assembly, ka KJP Synod Sepngi ki la pynpaw ka jingsngewsih kthang halor ka jingjia ïa ki parabangeit ha ka lynti sha jingïaseng Synod samla sha Nonglang. Halor kane, na ka liang ka KJP Synod Sepngi ha ka jingïadon lang ki dkhot ka Executive Committee, ki staff ka Synod Office bad ki dkhot ka Jingïaseng Samla Synod kila pynlong ïa ka jingïalang sngewlem mynta ka sngi (27.2.2017).Kumjuh ka Jingïaseng Kynthei Synod ha ka jingïakynduh ka Executive Committee jong ka kaba la long mynta ka sngi kala pynlong ïa kane kajuh ka jingïalang sngewlem (Condolence Meeting).

Shuh shuh na ka liang ka Synod ka duwai bad ïai duwai ruh na ka bynta jong ki baroh ba U Blei Un syrpud syrpai ïa ki met ki phad ba kin ïoh ïa ka jingkhiah kaba kham kloi, bad ruh ba U Blei da la U jong U Mynsiem Bakhuid Un pyntngen ïa ki mynsiem kiba pait ba pra jong ki longïing kiba la ïakynduh ïa kaba kum kane ka jingjia ba sngewsih.Na ka liang ka Khasi Jaiñtia Presbyterian Assembly (KJPA) ruh lyngba u Rev NS Phawa, Senior Administrative Secy. da ka mynsiem kaba sngewkhia ka pynpaw ka jingsngewlem kaba khraw ïa ki para bangeit ba ieit kiba la duh noh ïala ka jingim ha ka jingjia aksiden kaba la jia ha ka 26 tarik mynta u bnai hajan Nongspung katba ki dang ïa leit sha ka Jingïaseng Synod Samla kaba long ha ka Balang Nonglang.Ka KJPA ka duwai ïa ka jingpyntngen kaba da u Mynsiem Bakhuid ïa baroh kiba haïing hasem jong kiba la khlad kiba dei na ka shnong Nginiong, Mawbyrkong bad Nongbudum.

Na ka Jingiaseng Samla Khasi Jaintia Presbyterian Assembly ruh ka phah ia ka jingsngewlem sha ki ba ha ïing ha sem jong kito ki ba la khlad noh bad na ka bynta kito kiba dang don ha ka jingsumar mynta ha ki Hospital.

Da ka jingsngewkhia halor jong kane ka jingjia, na ka liang jong ki Nongkitkam ka Jingiaseng Samla Khasi Jaintia Presbyterian Assembly ki la pynlong ia ka jingiakynduh kaba

kyrkieh ha Office jong ka K.J.P. Assembly, Mission Compound mynta ka sngi. Ha kane ka jingiakynduh la pynlong ka jingsngap jar kaba ar minit bad la pynbud ruh da ka jingduwaiba U Blei Un pyntngen ia ki longïing jong kito kiba la duh noh ia la ki jong kiba ha ïing ha sem bad ba U Blei Un isynei ban pynioh ha kito kiba dang don hapdeng ka jingsumar ia ka jingkoit jingkhiah kaba kham kloi.

You may also like...